O le alii faipisinisi mai Aukilani, Leo Molloy, lea sa tulaga lelei le faagasologa mai o ana palota i palota faata’ita’i poo polls sa faatino e le aufaasalalau i le atunuu, o le Aso Faraile talu ai, o le aso mulimuli lea na faamuta ai le faaulu atu o suafa o ē fia tauva mo le tofi pulenuu, ae na faalauiloa ai e Molloy lona faaseetuagalu mai le tauvaina o le tofi pulenuu mo le Aai tele o Aukilani lea o le a faataunuu i le aso 8 o Oketopa.
I se faatalanoaga a le NZ Herald ma Molloy na ia ta’ua ai sa ia mata’ituina lava le faagasologa o palota faata’ita’i (polls) sa faagasolo ma o iinā na fua i ai lana faai’uga i le faaauau ona tauva pe leai.
E moni sa faasolosolo lelei lava a latou tapenaga ma i’uga na aliali mai palota faata’ita’i, peitai o le vaiaso lava lea na te’a nei na ia iloa ai e fua i numera na aliali mai, ua ia iloa ai e lē mafai pe leai se avanoa e ono manumalo ai.
O le palota faata’ita’i lava o le masina lenei o Aokuso na ia faamautinoa ai ua tatau ona fai lana faai’uga a o le’i tapunia le faauluina o suafa. Ma le saunoaga a Molloy, e lē faapea ua muta lona fia tauva mo lenei tofi, ae mo le taimi nei, o le a toe fai sana malologa mo le isi tolu tausaga, ma toe tapena mai ai mo le isi faigapalota o le tofi pulenuu i le 2025.
O le taimi nei, o loo muamua pea i luma le suafa o le tamalii Samoa, le afioga ia Faanana Efeso Collins i palota faata’ita’i talu mai ona amata i le masina o Iuni, ma e ui lava e le’i faataunuuina le faigapalota autū e pei ona faatulaga ia Oketopa, ae mo le tilotilo atu i le taimi nei ia i latou o loo faia i ai le tauvaga, o loo mafuli lava le lagolago a tagata o le itumalo ia Collins.
