Ua faamaonia mai e le Faatonusili o le Matagaluega o le Soifua Maloloina le pa’ū o le pasene o tagata e lei mae’a tuipuipui o le misela pe e lei faia foi ni tuipuipui, e amata atu i le talafatai o Apia e agai atu i Leulumoega.
Faailoa mai e Aiono e i le va o le 30 i le 50pasene o loo pa’ū ai le pasene o tagata e lei faia tui pe e lei mae’a foi i ia afioaga.
Ma o le a toe agai i tua le aufaigaluega i afioaga aemaise o aiga ina ia mautinoa e oo atu i le 90% ua mae’a uma tuipuipui o le misela aemaise lava i fanau.
O le tausaga e 2019 na oo ai Samoa i mafatiaga e leai se matua e toe fia oo iai ona o le fano o ola o alo ma fanau ona o le misela.
E iai nisi o atunuu o le Pasefika o loo pepesi ai le misela, ma o Niu Sila foi e laititi le fuainumera o alo ma fanau ua faia tuipuipui.
Ae na faaalia manino e Aiono, o le popolega o Niu Sila ona o le laititi o le fuainumera o fanau ua fai tuipuipui, ma afai ae pepesi i Niu Sila o le a oo i se tulaga ogaoga, ma o le a mautinoa le toe aafia ai ma Samoa.
Peitai na faaalia manino e Aiono o le naunautaiga o le Matagaluega ia oo ane i lea taimi ae ua malupuipuia Samoa ma ia aua ne’i toe iai se soifua e ma’umau ai.
O le taimi nei e 76% fanau ua mae’a faia tuipuipui muamua o le misela ae 86% ua mae’a uma tui e lua.
