Ua toe faasalalau nei le avanoa e toe sailia ai se faiaoga ulu o le aulakapi tele a le atunuu, le Manu Samoa 15, e pei ona faailoa mai luga o le upega tafailagi a le Lakapi Samoa.
O lenei faaiuga na faia ina ua mae’a se fonotaga talu ai nei a le Komiti Faafoe a le Lakapi Samoa, sa toe iloilo ai faatinoga (performance) a le ‘au i le taamilosaga o le Ipu a le Lalolagi talu ai nei i Falani.
O se avanoa o loo tatala atu i tua mo soo se tasi e agavaa ma ausia tuutuuga uma o loo moomia mo lenei tofiga tāua, lona uiga o loo mafai ona apalai mai iai nisi o loo galulue i totonu lava o le atunuu, poo nisi e talosaga mai atunuu mamao.
O le faiaoga ulu o loo iai i le taimi nei, le afioga Vaovasamanaia Seilala Mapusua, na tofia i le tausaga e 2020 mo lana konekarate o le faiaoga ulu e taitaia le Manu Samoa e tatau ona faamuta mai le faaiuga o le tausaga lenei 2024.
O se vaega o lana konekarate ina ia tapena atu le Manu Samoa mo le Ipu o le Lalolagi i le tausaga 2023 i Falani, ma ia mafai ona toe agavaa le ‘au mo le Ipu a le Lalolagi o le 2027.
Saunoa le Ofisa Sili o le Lakapi Samoa, Faleomavaega Vincent Fepuleai, e tusa ai o le silasila mamao a le Komiti Faafoe i le lumanai o le Manu Samoa, ‘e lei faigofie le faaiuga a le Komiti Faafoe, ae e fua le faaiuga i iuga na iai taaloga a le ‘au i le Ipu a le Lalolagi, aemaise foi le silasila mamao i le lumanai ma lu’itau o loo fesagai ma le taaloga i Samoa aemaise mo le atinaeina o tama taaalo mai totonu o le atunuu.
O le faaiuga ua faia e le Komiti Faafoe e lē faapea o le a toe taofia mai ai fuafuaga ua uma ona faataatitia mo le polokalame a le Manu Samoa 2024, ma o loo maua foi e le susuga i le faiaoga ulu ma lana pulega le avanoa e toe faatalosagaina ai le avanoa pe a manana’o ai.
I le faaiuga o le Ipu a le Lalolagi i le tausaga talu ai 2023, ua faatulaga mai ai le Manu Samoa i le tulaga 14 i ‘aulakapi uma a le lalolagi.
O le taaloga a le Manu Samoa ma le ‘au a Egelani lea na manumalo ai Egelani i ‘ai e 18 i le 17 a le Manu Samoa, o le taaloga mulimuli lena a le Manu i lalo o le taitaiga a le alii faiaoga ulu ia Mapusua.
O Seilala Mapusua ua loa lana tautua i ‘au a le atunuu, ma sa avea foi ma sui o le Manu Samoa i le tele o tausaga, aemaise foi sa taalo nisi o kalapu lakapi i totonu o Niu Sila e pei ona taalo ai i le ‘au a le Highlanders.
O le aso 8 o le masina o Mati i le tausaga le itula e 5:00pm o le ‘a fa’agata uma ai tusi talosaga mo e o lo’o fa’aulu a latou tusi talosaga mo lenei tofiga taua i le ‘au a le atunu’u
