E toalua sui mo le itumalo Sagaga No.2 a le vaega faaupufai le FAST lea ua toe faaopopo atu i le sui e to’atasi na iai e tauva o le faigapalota laititi i le masina fou.
O sui nei e toalua e aofia ai le Faalogo Ivins Chan K Tong ma Fata Ryan Schuster lea o le a tamomoe faatasi ma le afioga ia Fata Meafou i lalo o le faamalu a le FAST i faigapalota laititi i el Aso 26 o Novema. O lenei toatolu o le a tauva ma sui faatutū e toalua a le vaega faaupufai e Puipuia Aiā Tatau o Tagata (HRPP) ia Maulolo Tavita Amosa ma Faamausili Siona.
I ripoti a le Samoa Global na taua ai e le taitaifono o le FAST Laauli Leuatea Polataivao Schmidt o loo faasolo pea feutagaiga ina ia faaititia le numera o sui tauva e tamomoe mo le FAST lea e lei iai lava se itumalo ua toatolu ni sui a lea vaega faaupufai ua tauva ai.
E pei ona silafia o le itumalo Sagaga No. 2 e aofia ai afioaga e tolu, Malie, Afega ma Tuanai. I lea toatolu e toalua i laua na tauva muamua i le faigapalota tele i le Aso 9 o Aperila e aofia ai Fata Meafou o lē sa avea ma resitala o le faamasinoga ma le Alii faipisinisi Ia Faalogo Ivins Chan K Tong.
O Fata Ryan o se tasi sa avea ma Taitai Malaga o le au Lakapi o le Manu Samoa 15 sa iai foi lona naunau e tauva i le faigapalota tele i le Aso 9 o Aperila peitai e leo mafai ona o ni faaletonu i le resitalaina o lona suafa matai.
O lea la ua tau fai sii aao i latou nei e toe fia tauva i le palota laititi i le masina fou o Novema.
