O le tala fiafia mo le aufaitaavale ina o le a maua se faamāmā avega i le tau o le penisini ina ua faailoa mai lipoti i le aso ananafi o lea ua toe faaumiumi atu le fuel tax cut i le faaiuga o Mati ae le o Ianuari e pei ona sa fuafuaina ai.
O le tau foi o femalagaa’iga faalauaitele o le a tumau pea ona totogi na o le ‘afa o le tau o le pasese seia oo ia Mati 31.
Saunoa ai le minisita o Tupe Gran Robertson ua faia lea faatatau e fesoasoni ai i nai aiga o loo feagai ma luitau i le taugata o le soifuaga.
O le tau aofai o le fesoasoani a le malo seia oo atu i le faaiuga o Ianuari tausaga fou sa fuafua e oo atu i le 1.3 piliona ma o le toe faaopoopoga ua faia nei ua fuafua e faaalu ai le isi 116 miliona lea fai mai Robertson e faatupe mai i savings poo tupe ua sefe mai i isi vaega o auaunaga.
