Ua faamaonia mai e le Komesina ina ua fesiligia e a tatou tala le toe faafoi atu ai o le faila o le suesuega i le mataupu faatatau i le tagi a le Minisita o Atinae ma Galuega tetele ia Olo Fiti Vaai faasaga i le sa avea ma Palemia ia Tuilaepa Sailele Malielegaoi, i le ofisa o le loia sili.
E lei mamao atu na tuuina atu ai le faila lenei ma le fautuaga a le Tamaitai Loia Sili ina ia faamaea nisi o itu.
Na faaalia e Auapaau Logoitino Filipo, o le vaiaso ua mavae na toe tuuina atu ai le faila lea i le Loia Sili i le maea ai ona faatino tulaga sa aumai ai lana fautuaga, o le isi itu o lea ua faailoa atu e le Matagaluega e tatau ona saili e le ofisa o le loia sili se loia tutoatasi e faatautaia lea mataupu.
O i latou e iai le malosiaga latou te mafai ai ona faasoa atu le galuega lea i se loia tutoatasi. Ua faailoa foi e Auapaau ua faamalieina mea uma sa tuuina atu ai le fautuaga i le Matagaluega ma o le valaau o loo faatali iai a le Loia Sili pe o se loia tutoatasi foi ua tuuina atu iai le galuega ona faatino lea o le tiute o le Matagaluega o Leoleo.
