Ua toe faaauau faigamalaga faavaomalo i le malaevaalele i Aukilani na amata mai i le aso ananafi.
E pei ona silafia ma maimoaina i ata i luga o televise na matuai lolovaia uma le malaevaalele i le Aso Faraile faapea foi ma le Aso Toonai ma e silia ma le 2 afe tagata malaga na poloka ai i le malaevaalele le taimi lea ona ua poloka foi ma auala i le agai atu ma le agai ese mai ma le malaevaalele.
Ua faailoa manino i se pepa o faamatalaga mai le pulega o le malaevaalele o le a iai pea fesuiaiga i faigamalaga ona o le faaletonu lea ma mea faaleagaina i lologa ma fautuaina ai pasese ia siaki i kamupani vaalele sa faia ai bookings mo le faamautuina o fetuunaiga i faigamalaga.
Pe ā ma le 50 pasese na mafai ona mapu ane i le Auckland Airport Marae i le taimi lea o lologa a o nisi sa saili i aiga ma uo lalata ane e aumau ai ma isi sa agai i faletalimalo.
Ua iai foi lipoti e iai nai pasese matutua e silia ma le 80 tausaga na momoe ai lava i le foloa o le malaevaalele i le taimi lea a o talitali ai faigamalaga sa fuafua e malaga ese ai ma Niu Sila i le taeao ananafi.
