Ua toe ave i tua mai le Faamasinoga Maualalo le tusi talosaga a le tamaitai o Perkin Feagiai Headle-Taufao, na faaulu atu e tuua ai Samoa mo Amerika.
O le taeao analeila na tolaulau ai le mataupu i le Faamasinoga i luma o le tamaitai Faamasino ia Alalatoa Rosella Papalii.
O loo molia Taufao i lona faia o faamatalaga e ta’uleagaina ai le itu ta’uleleia o se tagata e ala lea i lona lalafo o upu poo ni faaupuga matuiā i sui o le Vaega Faaupufai o le Faatuatua i le Atua Samoa ua Tasi.
O le aso 22 i le aso 24 o Mati o le tausaga fou lea ua tuu atu iai o le a faafofoga ai le Faamasinoga i mau o le mataupu lenei.
O le aveesea mai le faamasinoga o le talosaga na faia lava lea e le tamaitai o loo tulai e tali i ona moliaga e 26 e tauala atu i lana loia.
O loo tatala i tua Perkin ma tuutuuga ua iai, e pei o le taofia ai o lona tusifolau Amerika i le lesitala o le Faamasinoga.
O lea foi ua aveesea mai lana saini i le ofisa o leoleo sa faatulaga i tuutuuga o le tatala ai i tua peitai, o loo ua tuuina atu foi ina ia faapea ona faaoo atu se isi tusifolau mo le taofia, pe afai e iai sona tusifolau Samoa.
Ua faailoa o le a nofo pea lea tamaitai i Samoa nei e faatali ai Mati o le tausaga fou e toe valaau ai lana mataupu.
