O seisi luitau fou ua fesiligia ai le tulaga o iai tulaga faamalosia o tui puipui poo vaccine mandates o le koviti 19 a le malo I luga o tagata faigaluega I le matagaluega o aoga faapea foi male soifua maloloina, ua amataina nei I le faamasinoga maualuga I Ueligitone ma ua iai foi ma seisi kulupu fou o tagata tetee i ia tulaga ua agai ane I le laumua e faaali lo latou lagolago ile faamoemoe.
Lipotia e le Herald ile vaiaso nei ole iloiloga a le vasega o faatonu o le faamasinoga na ave ile faamasinoga e le NZTSOS) poo le NZ Teachers Speaking Out with Science atoa ai ma leisi kulupu o le NZDSOS le asosi lea o fomai, ua toe talosagaina ai le faamasinoga ina ia faaleaogaina le poloaiga e faatatau I tui puipui, le vaccination order ona ua faaalia e I latou ia o Ia mandates ua solia ai aiaiga o le Bill of Rights Act poo le Tulafono o Aia Tatau.
O loo fesiligia foi e I latou ia pei ona faailoa ile lipoti le aoga o vaccine mandates ise siosiomaga o loo pepesi ai le omicron ma tusilima ai I nisi o faamatalaga mai nisi o tagata galulue faapolofesa I le auaunaga tau le soifua maloloina, lea latou te taua o le tulaga malosi o le vave o le pepesi o le omicron e le ono manaomia ai le faamalosia oni tulaga tau le faia o tui puipui poo vaccine mandates.
O le faalua ai lea ona oo le mataupu lenei I le Tulafono mai kulupu ia e lua, o le uluai taimi na fofoga ai le mataupu ile faamasinoga sa faaleaogaina ai e le faamasino o Matthew Palmer peitai la o le finauga lona lua lenei ua aofia atu ai ma tautinoga poo faamatalaga tusitusia mai nisi o faiaoga ma tagata faigaluega I le soifua maloloina ile atunuu lea ua faamatala ai le maumau o galuega ona o le latou faaiuga e le faia ni o latou tui puipui.
E tali tutusa lava le mataupu lenei ma le finau a le kulupu a leoleo ma le vaega o le puipuiga poo le Defence Force a Niu Sila lea foi sa tuuina I le faamasinoga ma manumalo ai I le vaiaso talu ai lea la ua toe faamuta ai le faagataina o auaunaga a I latou elei faia ni tui puipui mai ia auaunaga ona o le faaiuga na tuu ane ele faamasinoga.
O le aso Gafua ua fuafua e faamaea ai le mataupu lea a faiaoga ma fomai ile faamasinoga.
