Ua se’i ma a’a e le faigamalo ua iai nei le fuafuaga a le faigamalo sa iai, i le vaalele 737-800 ma ua faamuta ai ma lea fuafuaga, peitai ua toe ave lava le tuualalo a le ta’ita’i o le Itu Agai ua augani ai i le Palemia ma le Faigamalo e toe aumai le vaalele, i lona atugaluga i le tulaga ua siita’i ai nei pasese, ma ua faaalualuō ai ma kamupani vaalele mai fafo i le fu’e ma fafao le tafe atu o seleni ia latou auaunaga ma le tautua i malaga faavaomalo. I faasalalauga i upega tafailagi mai le nofoaga autū o le vaega e puipuia aiātatau a tagata i le Aso Lua, na faaalia ai e le susuga Tuilaepa L Sailele Malielegaoi, e tāua le iai pea o se vaalele tele a Samoa o se atunuu na mua i malae i le va nonofo ma isi atunuu o le Pasefika i pulegamalo tuto’atasi.
Le ta’ita’i o le Itu agai, susuga Tuilaepa L Sailele Malielegaoi. O se feiloaiga talu ai nei a tusitala ma le tamaitai Palemia sa toe tuliloa ai sona finagalo i le mataupu i le vaalele, ma faaalia ai e le afioga Fiame Naomi Mata’afa, o loo iai isi kamupani vaalele o loo tautuaina faigamalaga, ae o le taimi nei o loo galulue pea le komiti na filifilia e le Kapeneta e silasila atili i le mataupu i se vaalele.
