Ua mae’a tuuina atu folasaga a loia a le sui Faipule o Gagaifomauga 3 lea o loo talosaga ai i le Faamasinoga Maualuga e toe iloilo aiaiga o loo tatala ai i tua le susuga Laauli Leuatea Polataivao Fosi Schmidt mai moliaga o loo tuua’ia ai, e pei ona mafua ai ona faamuta e le tamaitai Palemia lona tofi Minisita o le Kapeneta.
O ia aiaiga sa faamautū i se faai’uga a le Faamasinoga Faaitumalo ina ua ave le talosaga a loia a leoleo i lea faamasinoga, na toe lu’i ai le faai’uga a le lesitala o faamasinoga sa tatala ai i tua le sui Faipule o Gagaifomauga 3 e aunoa ma ni aiaiga.
O le toe apiliina e loia a Laauli o ia aiaiga sa tuuina atu ai foi le folasaga a loia a leoleo o loo teena ai lea talosaga toe iloilo poo le apili.
Ua tālia nei se faai’uga a le Faamasinoga Maualuga ma e lē o iloa se aso e fofogaina ai.
