I feoaiga a vaalele faavaomalo faapea totonu lava ia o Niu Sila, o lea faatoa toe amatalia i le taeao nei e pei ona taofia ai mai ananafi, ma e tusa ma le 50 i latou na aveesea mai anapo mai le malaevaalele ae auina atu i le Civil Defence Centre i le Trusts arena, ma o lea na malolo ma malu ai anapo e tālia ai le toe amatalia o faigamalaga i le asō.

Ua sau ai foi ma le lapataiga mai le malaevaalele, e onosai e ono oo atu i le vaiaso o tau fetuunai pea pasese feoai ona o aafiaga na iai nei.

O loo mafanafana foi le kamupani vaalele a le Ea Niu Sila e toe amata felelei a latou vaalele e faaaoga ai malaevaalele i Aukilani i le asō, ma e oo mai i le taeao nei e 9 faigamalaga na suia nofoaga e tulaueleele ai ma e tusa ma le 49,000 pasese na aafia ai.

I aoga a fanau, o Aukilani o le asō ua toe a’e ai, ae mo Hawke’s Bay e tele aoga e le o mafai ona a’e i le taeao nei ma o loo faaauau ai pea ona malolo i le asō ona o mea ua faaleagaina e Gabrielle.

Ae i se tala mai le malo ananafi ma faamaumauga e oo mai i lea taimi o iai, e tusa ma le 2,500 tagata ua leai ni fale.