E toatolu ni alii ua molia i Sini i ni faiga taufaasese ua faia i e-tags fai mai e silia ma le 2.2 miliona tupe o loo aofia ai.

O lipoti a le 9News ua ta’ua ai o le Strike Force Aratula na amata faatūina ia Ianuari e suesue ai faiga faasolitulafono ia e fuafuaina lelei e le ausolitulafono ma e feta’ua’ina ai le faatau o e-tags ae iai sootaga i ni faiga taufaasese mo le totogiina, e faaaogā ai credit cards taufaasese e faaaogā ai foi ma upega tafailagi.

E talitonu le ausuesue ua leva ona faagaioi mai ia ituaiga faiga ma ua pe ā ma le lima tausaga o faia pea, e matele i e-tags o loo faatau agai i avetaxi.

Mai le ta o le 5 i le vaveao ananafi, e 4 search warrants poo poloaiga e saili ai ni nofoaga i Smithfield, Blacktown, Punchbowl ma Granville sa faataunuu e leoleo.

E 37 tausaga o le isi alii na pue mai i Smithfield ma molia i moliaga e 204 faatatau i faiga taufaasese ma le auai i se kulupu solitulafono.

O le asō e tulai ai i le faamasinoga ma e lei ioeina le tatala i tua.

Na pue mai le isi i Blacktown e 38 tausaga ua faia foi iai moliaga e pei ona ta’ua ma sa tulai i le faamasinoga i le aso ananafi.

O le suesuega na faatino e leoleo na faatalanoa ai avetaxi ma faatino ai suesuega i e-tags e pei ona feta’ua’ina.

O le isi alii e atoa iai le toatolu e 28 tausaga na pue mai i Punchbowl ma e tulai foi i le faamasinoga i le asō.

Puna o Faamatalaga: https://www.9news.com.au/national/e-tag-fraud-alleged-scheme-2-million-dollars-people-arrested/c7a80cf3-aaf7-4bda-be9f-70f8322a58bb