E tolu ni maliu na lipotia i le faai’uga o le vaiaso mai ni faalavelave eseese tau taavale na tutupu i totonu o le atunuu, na tapunia ai foi nisi o auala ma o loo aga’i nei iai su’esu’ega a leoleo.
Muamua o se taavale na lavea i Waimarama Rd i Hastings pe tusa o le toe kuata i le 7am i le taeao o le Aso Toona’i, na alu ane ai le valaau i leoleo ma na oo atu ma iloa ai e to’atasi se tagata ua maliu.
E tele itula na tapunia ai lena vaega o le auala a o faagasolo su’esu’ega a leoleo.
Lona lua o se faalavelave na tupu a o toeitiiti ta le 11am i le taeao lava o le Aso Toona’i, na faavave atu ai auaunaga mo faalavelave faafuase’i i se taavale ma se uilaafi na lavevea i luga o le State Highway 1 i Mangaweka e latalata i Taihape.
Na maliu ai lava iinā le tagata na aveina le uilaafi.
Ma le faalavelave lona tolu, na lavevea ai ni taavale se lua i Lindis Pass-Tarras Rd i le ogatotonu o Otago i le aoauli ananafi.
Na maitauina e leoleo ni taavale se lua o lavevea e latalata i le Omarama-Lindis Rd i le tusa o le toe sefulu minute i le ‘afa o le 12pm i le aoauli ananafi.
E ui i taumafaiga a auaunaga lavea’i sa faia ae na maliu ai lava le tagata e to’atasi i le mea na tupu ai le faalavelave.
Puna o Faamatalaga: https://www.1news.co.nz/2026/03/15/two-dead-in-separate-north-island-crashes/
