O loo agai nei le sailiga a leoleo mo le tau sailia o ni alii pagota se toatolu na sosola ese mai se van a leoleo na fuafua e momoli atu ai i latou i le falepuipui i Mt Eden i le aoauli ananafi.
O lenei faalavelave na tulai mai luga o le Southern Motorway i le tusa o le 2.40pm ananafi e latalata i le vaega e afe ese mai ai ma le Ellerslie-Panmure Highway, a o tau agai atu le van i le itu i Matu e agai i le nofoaga o le Falepuipui i Mt Eden.
Ta’ua i se lipoti i le NZ Herald, na sosola ese mai le van nei pagota ma tamomo’e ese e aunoa ma ni seevae agai i le South-Eastern Highway o iina na latou gaoia ai se taavale ma faaauau ai loa le latou solaaga.
O loo galulue faatasi leoleo ma le vaega o le Police Air Support Unit, Eagle, aemaise lava o loo ave le latou faamuamua i le tulaga saogalemu o le mamalu o le atunuu e ono fesootai i ai nei pagota sosola.
O loo lapataia e leoleo le mamalu o le atunuu ina ia mataala ma faaeteete pe afai e ono iai ni faailoilo e latou te mate’ia ai nei alii pagota i se vaipanoa, ma ia vave ona vili le numera 111 e faafesootai ai Leoleo.
