Ua faamautu nei le filifiliga o faaululuga o le Matagaluega o Faamasinoga ma Mataupu Tau Faamasinoga, o le tofiga Loia Sili a le Malo, ma le faauluuluga poo le Ofisa Sili o le Pulega o Tusipasi ma Faailoga Taualoa a Samoa.
O le mae’a o le fono a le Kapeneta i le ogatotonu o lenei vaiaso ua faailoa ai le filifilia o le Susuga Papalii John Taimalelagi Afele, e avea ma Ofisa Sili o le Matagaluega o Faamasinoga ma le Faafoeina o Mataupu Tau Faamasinoga.
E pei ona silafia o lea tamalii sa tauaveina muamua lea tofiga i ni tausaga ua mavae, ae na faamuta lana auaunaga i se faaiuga a le Kapeneta a le faigamalo sa iai i le tausaga e 2019.
Na mafua lea faaiuga ona o se fautuaga a le komisi o galuega a le malo e mafua i se suesuega faalotoifale i ni amioga sa tuuaia ai lea tamalii.
Na toe talosaga o ia i le avanoa i le lata i le tolu tausaga talu ona ia tuua le tofiga, ma ua toe faamanuiaina e pei ona toe see atu e tauave le tulaga Ofisa Sili o le pulega o lea matagaluega.
O le faletua le Susuga Su’a Hellene Wallwork, sa tofia ma faatautoina ia Setema o le tausaga na tea nei e avea ma Loia Sili mo se taimi le tumau, e faatali ai le toe sailia o se isi e tauaveina lea tofiga ina ua faamuta e le Malo le taimi galue o lē sa avea ma Loia Sili, o lea ua tofia nei ma ua faamaonia e le kapeneta lona avea ma Loia Sili mo le 3 tausaga.
I le ma le tasi o tofiga mo le faamaonia lea e le Kapeneta o le filifilia o se Ofisa Sili fou mo le ofisa o le Pulega o Tusipasi ma Faailoga Taualoa le Samoa Qualification Authority, lea ua pale atu iai le susuga Tupa’i Peter Peilua.
O lea tamalii o le atunuu ua 18 tausaga o tautua i Niu Sila i faalapotopotoga tuma’oti ae silia i le 10 tausaga o tautua i galuega e fesootai ma le auaunaga o pulega o faailoga ma tusipasi taualoa.
O i latou e toatolu ua filifilia o loo umia faailoga mai aoga maualuluga ma iunivesite sa aoaoina ai.
O loo faatalia le filifiliga o se faauluuluga o le matagaluega o tiute ma tupe maua.
