Ua faatupulaia pea le toatele o tagata e moomia fesoasoani i meaai poo foodbanks.
Talu mai ona sau le Koviti ua alu i luga i le 165% le toatele o tagata e faatalosaga e tusa ma suesuega a le New Zealand Food Network.
Ua maua ai e tusa ma le 480,000 ma ona tupu tagata Kiwi e faatalosaga i masina taitasi e moomia le fesoasoani i meaai.
O le taugata lava o le soifuaga le mafuaaga o loo fai mai ai le toatele, sosoo ai ma le maualalalo o totogi ae lona tolu ai le leai o se galuega.
Ua fai mai ai ma le New Zealand Food Network e le o faigofie ia i latou le toatele o tagata e faatalosaga atu, ma o le isi itu e faigata ai ona o lea foi e faalagolago a latou foai i meaai o loo maua mai pisinisi faapea tagata o loo foai.
A o fia fesoasoani ai la le New Zealand Food Network i aiga o loo moomia meaai, ae o loo fua lava foi lona aaomafola i foai o loo toe maua atu.
