E lei fiafia leoleo i le toatele o ē na pueina i uluai aso o le Schoolies Week i Kuiniselani, o se tasi lenei o tulaga e faia i tausaga taitasi i Ausetalia mo i latou faaiuaso i aoga maualuluga.

Fai mai le komesina o leoleo i Kuiniselani Katarina Carroll o le aso muamua o lenei faamoemoe i le Aso Toonai sa tulaga lelei lava na o le toafa na pueina e leoleo.

Peitai a o faasolosolo mai pea le vaiaso ua maitauina le toatele o tamaiti ua pueina mai lea faatasiga. O le tausaga lenei ua vaaia ai le toatele o le aufaaiuaso ua agai atu, pe a ma le 25 afe talavou o loo iai.

O i latou ua pueina e leoleo e toa 24 mo le taimi nei ma ua molia i moliaga e aofia ai le umia o fualaau faasāina ma isi solitulafono,

Fai mai le komesina e le afaina le fiafia ma faamanatu aua ua ausia se tasi laasaga o le olaga i le mae’a o aoaoga i le tulaga lea, peitai e manaomia ona faaitiitia le solitulafono ma ia faamautu o loo saogalemu.