O le tausaga na te’a nei 2023 na faatino ai se sailiiliga ma se su’esu’ega na tāpā ai ni finagalo o tagata o alala i Samoa ma atunuu i fafo, e faatatau i le polokalame a le malo o le faaaliga o le Teuila poo le Teuila Festival week e faagasolo i tausaga ta’itasi i le vaiaso muamua o le masina o Setema.
O le saunoaga autū a le ta’ita’i o le Malo o le Minisita foi lea o tagata tafafao, na faailoa ai e le afioga Fiame Dr Naomi Mataafa, e to’atele lava tagata o loo lagolagoina le Teuila e tusa o le taunuuga o lea sailiiliga poo se survey.
O le tausaga e 1990 na ulua’i faavaeina ai lea polokalame i le agaga autū o le malo e avea o se taumafaiga e faatosina mai ai tagata tafafao mai fafo, ae toe autalu ma polili atili ai tu ma aganuu a Samoa e ala i taaloga, faapea pese ma siva faaleaganuu.
Ua 34 nei tausaga le matua o le Teuila.
O se vaega o le saunoaga autū mai le ta’ita’i o le Malo le afioga i le Palemia, Afioga Fiame Dr Naomi Mataafa, na tatala ai polokalame uma o le Teuila o lenei tausaga.
O le ta’ita’ifono aoao o le Ekalesia Faapotopotoga Kerisiano Samoa na ta’ita’i i le sauniga lotu, na tatala ai le vaiaso o le Teuila, ma sa auai le afioga i le Ao Mamalu o le Malo ma lana Masiofo faapea le Sui o le Fono o Sui Tofia.
E lima aufaafiafia faaleaganuu ma nisi e talenia i le siva ailaoafi sa faafiafia i le po o le Aso Gafua le uluai aso o le Teuila.
O le vaiaso atoa lenei ua faasā ai ona faaulufale i nofoaga o loo faatino ai polokalame o le Teuila ni faguvaipa’u ae ua saunia nofoaga e maua ai le vaiauli mamā mo le atunuu.
