E toatele tagata Niu Sila o loo lagolagoina le suiga ua faia e Ausetalia, o le faatau o vapes e faaaoga ai pepa talavai.

O le suesuega lenei ua maua ai foi le maualuga o le fuainumera o tupulaga talavou e tagofia le vape i totonu o le aso e tasi e faatusatusa i tagata matutua.

O se tasi foi o suesuega na maua ai o le 10% o fanau aoga o loo i le vasega 10 e tusa lea ma le 13 ma le 14 tausaga ua matuai vaisu lava ia i latou le vape.

Fai mai ai se tasi o fomai i tala a le Herald ua iai le popolega i le maualuga tele o fanau talavou e tagofia le vape, ma e moni o lea na fai mai o le vape e fesoasoani e momotu ai le taumafa tapaa, ua tatau foi ona autilotilo i itu e puipuia ai tupulaga talavou.

Ua sau ai ma le valaau ua tatau ona fai e Niu Sila le suiga ua faia nei e Ausetalia o le taofi o le faatau saoloto o le vape ae suia agai i le tapa o le pepa talavai e faatau ai.

O le amataga o le masina lenei na fai mai ai le minisita o le soifua maloloina, Dr Ayesha Verrall e le o iai se faamoemoe e mulimuli Niu Sila i le suiga ua faia e Ausetalia, ae fai mai le taitai o le National Christopher Luxon, ua moomia le fai o se faiga e aofia ai ma le faasā.