Fai mai lipoti i le asō ua toatele se aofaiga o tagata faigaluega faufale, fai auala ma isi galuega e fausia ai mea ua agai ese ma Niu Sila aemaise ina ua maitauina le tele o nisi o poloketi tetele ua faatuai ma ua lē maua ai se tulaga mautonu i le tele o nei galuega.
Ua ta’ua e le televise tasi o le faaiuga a le Malo e faalēaogāina le Three Waters ma le Light Rail ua toatele ai tagata faigaluega ia ua leai ni galuega ma ua o latou unaia le Malo ina ia vave a latou gaioiga ma toe amata nisi o poloketi a o lei faasee uma atu le tele o le aufaigaluega e iai tomai i atunuu i fafo.
Ua molimau ai foi nisi o le aufaipisinisi i le tulaga ua iai nei galuega, sa sologa lelei lava mai le tuanai peitai o le faaitiitia ma le lē mautinoa o tulaga tau tupe mo le faatupeina o galuega ua mafua ai le tele o le lē mautonu ma o loo faamoemoe ia vave foia lea tulaga ma toe foi galuega i le tulaga sa iai.
Ta’ua i le lipoti ua tusi atu nei taitai o lea matata i le minisita o Chris Bishop lea e feagai ma auaunaga nei ina ia maua vave ane se fesoasoani.
Ua lipotia se tali ane mai le minisita e faapea, e tele galuega o loo iai aemaise o loo tali atu i aafiaga o le tau i le siosiomaga ma o loo tele galuega o loo faia ai i mea sa faaleagaina, fai mai a ia e toe amata loa isi poloketi a le Malo ona toe malamalama mai lea o le agai atu i le lumanai.
Puna o Faamatalaga: https://www.1news.co.nz/2024/04/29/construction-workers-leaving-nz-in-droves-amid-big-project-delays
