Ua toe sau lapataiga e toatele atu tagata ua gaoia o latou faamaumauga na i lo le aofai na muai faailoa mai e le kamupani a le Latitude Financial.

O le tala lata mai lea a le kamupani ua lapataia ai i latou o loo iai a latou sea i totonu o le kamupani, ma o faamaumauga nei aveesea faagaoi mai le aso 16 o le masina lenei o Mati.

O uluai lipoti na aumai e faapea e 330,000 paaga mai Niu Sila nei faapea Ausetalia ua aafia ai, ma o le 96% o laisene avetaavale ua gaoia, ese ai nisi o paaga ua gaoia tusifolau.

Peitai o le tala lata mai ua sau nei o lona uiga e le na o lea pau lea o le aofai o tagata aafia, ma e oo mai i le taimi e tuufaatasia ai tala fou e lei toe faasa’oa mai pe faamautinoa mai le aofaiga sa’o o tagata aafia.

Maua e tala fou o lea ua maua e le toatele imeli mai le kamupani ma le faamatalaga o le a faafesootai sa’o oe pe a afai o lea ua gaoia ou faamaumauga.

Ua faatoese ai le kamupani ma fai mai ai o le a faatupe e le Latitude tusifolau fou e toe suia ai tusifolau ua gaoia faamaumauga.

Peitai i se tali mai le matagaluega o le va i fafo, e le tau moomia le faafou o tusifolau o le tusa ma le 1300 ma ona tupu ona o lea lava e iai auala e ala i faiga faatekonolosi e puipuia ai tusifolau.

O se tali e le o taofia ai e le matagaluega i latou ua gaoia faamaumauga o tusifolau ma o loo mananao e toe talosaga, ma o lona uiga o le toe talosaga mo se tusifolau fou ae uma toe totogi e le Latitude tupe ua faaalu.

O le Latitude o ia lea e ana le Genoapay ma le Gem Visa.