Ua lipotia e 23 tagata Niu Sila o loo aofia ai i le pasese a le vaalele a le Singapore Airlines lea na sau mai Lonetona agai mai i Singapore ae tupu ai se faaletonu ina ua fetaui ma se tulaga na aafia ai le vaalele ma featofa’i solo ai le pasese i totonu o le vaalele ma faamalosia ai le tulaueleele vave i Bangkok.
O le lipoti mai le kamupani vaalele a le Singapore Airlines ua ta’ua ai ia faamatalaga e pei ona lipoti mai e le RNZ ma ua faailoa foi la e le kamupani vaalele a le atunuu le Air NZ o loo galulue nei ma le Singapore Airlines e faamautu le tulaga o nisi o pasese mai Niu Sila nei na faia atu a latou bookings e faaaogā ai le maliega ua faaigoa o le code share.
E toatasi si tamā ua maliu ai i lenei faalavelave ma le toatele o loo manunu’a ma taofia i falemai i Bangkok.
Ua ta’ua i lipoti na tupu le faaletonu lea i le vaalele a o laulau le ti o le taeao e le aufaigaluega ma pe ā ma le 10 itula talu ona agai ane le faigamalaga ma ua i luga tonu o Myanmar.
O molimau a nisi o pasese e pei ona agiga i upega tafailagi ua ta’ua ai e toatele le au manunu’a ma ina ua tulaueleele le vaa sa faavave loa i le falemai i latou e tugā manu’aga, pe ā ma le toavalu na ave i stretchers.
O le tamā ua maliu ua ta’ua e 73 tausaga mai Peretania, ma o loo faaauau le suesuega i lenei faalavelave.
Puna o Faamatalaga: https://www.rnz.co.nz/news/world/517450/one-dead-dozens-injured-as-singapore-airlines-flight-hits-severe-turbulence
