Tusia – Maina Vai
Ua taua i se pepa o faamatalaga mai le Komiti o Faalavelave Tutupu Faafuase’i le toe faaopoopo ai o le toalua i ē ua aafia i le vairusi o le Koviti 19. O i laua e toalua ua ta’ua sa latalata i se tasi o le aufaigaluega a le Matagaluega sa muai pesia i le aso Faraile 11 o Mati,2022.
O lea ua atoa ai le 15 o tagata ua pesia i le vairusi o le Koviti talu ona taunuu mai le malaga mai Aukilani i le Aso Sa 6 o Mati,2022. O i laua ua aafia o se avetaavale ma se tasi o le au faigaluega.
Ua taua e leai ni aafiaga o vaaia ia i latou ua maua ai le vairusi i le maea ai o a latou suesuega, o loo ua faanofoesea foi i le nofoaga malupuipuia i le falemai i Motootua.
O loo tuuina mai pea fautuaga mai le Komiti o Faalavelave tutupu faafuase’i mo le atunuu ina ia faia talifofoga, ma ia tautuana le va ma le isi tagata, faapea ai le tatafi o aao i taimi uma.
Ua faamanatu mai fo’i e matua faasaina nofoaga o loo faanofoesea ai pasese na omai ona agai, ulufale pe uia e se tasi
O le taulogologo e le’o mapu lava mo i latou e lei maea o latou tui e tolu ina ia agai e faatino lea tulaga mo le puipuiga e le gata mo i latou ae o le atunuu atoa.
