O Steve Luatua ma Jeff Toomaga Allen, o ni tamafanau a Samoa sa taaalo muamua i le aulakapi o le All Blacks a Niu Sila, ua agavaa i suiga o tulafono a le pulega o le lakapi o le lalolagi ua mafai ai ona taaalo mo le aulakapi a le atunuu o le Manu Samoa.

O i laua ia ua aofia i le ‘au filifilia e 32 mo le malaga taamilo a le tatou aulakapi i Europa i le masina fou o Novema. E le gata ina filifilia ia tama o le Olopeleki i le Manu Samoa, ae e toalua nisi o tama lakapi i totonu lava o le atunuu ua aofia i le ‘au ua faalauiloa. O i laua ia o Des Sepulona ma Joe Perez.

Faaalia e le faiaogaulu le susuga Vaovasamanaia Seilala Mapusua, o nisi ia o tama lakapi sa ia matauina le maualuga o le la taaalo i nisi o taaloga ua mae’a a le tatou Manu Samoa. E toavalu tama o le taimi muamua lenei ua laei ai le jersey lanu moana o le Manu Samoa ae o le toatele o tama o le ‘au o i latou o loo taaalo i kalapu i Europa.