Ua faamaonia le isi tagata ua maua i le misela i Aukilani.
O le case lona lua e faapea o se tasi o le aiga o le tamaititi aoga poo le uluai case na ta’ua i lipoti ananafi.
O le asō o loo faaauau tapunia ai pea le aoga a Albany Senior High School a o suesue le uluai case poo le tamaititi aoga lea sa iai i le aoga i le Aso Tofi ma le Aso Faraile o le vaiaso talu ai ma le lē iloa ua maua i le misela.
O cases toalua ua faamaonia nei i Aukilani o loo faanofoesea uma i le fale ma i nisi o lipoti e faapea e iai le fesootaiga o le uluai case na ta’ua mai ma se tasi faatoa taunuu mai atunuu i fafo.
E tasi le nofoaga ua mautinoa i lipoti a le soifua maloloina o lea na asia e le case faamaonia i le aso 20 o Aperila, o le Chemist Warehouse i Albany mai le toe kuata i le itula e tolu i le aoauli agai i le’ afa o le fa i le afiafi.
A o faaauau ai contact tracing, ua faaalia le popole o nisi o tagata suesue faapitoa i le soifua maloloina i le ono vave pepesi o le misela a o lea e maualalo le pasene o tagata ua uma ona fai tuipuipui.
