E toalua tagata ua pueina e leoleo ona o lo la auai i le tele o le mau gaoiga i faleoloa o avamalosi i Aukilani i Saute lea ua lipotia ua manu’a tigaina ai ma se tasi o faatauoloa.
Fai mai o le isi gaoiga na tupu i le liquor store i Ferguson Rd i Otara ua feta’ua’ina sa faaaoga ai ma se fana ma faaoolima ai i se faatauoloa ma sosola ese ai mulimuli i se taavale.
O le isi gaoiga o le faleoloa foi o avamalosi i Ranfurly Rd Papatoetoe, ua lipotia sa faaaliali ai foi se fana ae lei faaaogaina.
E talitonu leoleo e iai le sootaga o faalavelave ia e lua ma faia ai loa le sailiga o ni fale i Otara i le aso ananafi.
E toalua alii 26 ma le 36 tausaga le matutua ua molia ai ae na maua ai foi ma se fana i se tasi o nofoaga na sueina e leoleo.
O moliaga o le toalua lea e aofia ai le gaoi faaaupegaina, faaoolima faamoemoeina.
Fai mai le leoleo asiasi i Counties Manukau i le lipoti a le One News o soo se gaioiga tau sauaga e faia i tagata lautele e le taitai ona taliaina e leoleo atoa ai ma ia ituaiga solitulafono.
