E to’alua nisi Ofisa Sili poo faauluuluga o isi Matagaluega a le Malo ua maea a laua Konekarate ma ua faamuta o laua tiute sa galulue ai ae faaatali pe toe valaauina e faaauau le tautua i tofiga na tautua ai pe afai ae toe talosaga i ia avanoa faigaluega.
O le Ofisa Sili o le Matagaluega o Fesootaiga ma Faamatalaga Tekonolosi le susuga Fualau Talatalaga Matafeo ma le Ofisa Sili o Pulega o le Matagaluega Tetele a le Malo le afioga Magele Hoe Viali na faamuta i le vaiaso nei o laua tofiga.
O nisi o faauluuluga ua maea o latou taimi galue ma ua faamuta ai foi le tautua e pei o le Matagaluega o Tina ma Tamaitai Atinae o Nuu, Afioaga ma Agafesootai e oo mai i le taimi nei e le’i faia se tofiga fou ae o le avanoa o le Ofisa Sili na maea i le tausaga ua mavae ma ua uma foi ona faatalanoa i latou sa tusi talosaga.
O le tasi faauluuluga ua tapunia tusi talosaga o le tofiga lea o Komesina o Leoleo Falepuipui ma le Ola Toe Fuataina o loo faatalia foi poo ai o le a filifilia ai. O se tasi o faiga faavae a le Vaega of le FAST ua avea nei ma faigamalo o le toe faafoi lea o le tutoatasi o le Komisi e pulea Tagata Faigaluega a le maloe pei ona sa sau a’i i le tele o tausaga ua tuanai i le faia lea e le Komisi o le filifiliga o tagata faigaluega e aunoa ma le toe aafia o le Kapeneta mai le toe faia o faaiuga.
