O le Aso Faraile o lenei vaiaso ua malaga atu ai i Savaii se vaega o leoleo mai le ofisa autu i Apia e faia se sailiiliga i le mafuaaga o le faalavelave i le Aso Tofi nei i le afioaga o Fogapoa, ua maliliu ai ni alii se toalua.

Ua faailoa mai e le sui Komesina le susuga Auapa’au Logoitino Filipo i le po anapo, ua taofia nei se tamā 50 tausaga o le soifua mo su’esu’ega, ma ua taofia ai foi ma se a’upega o se laau malosi o loo masalomia na faaaogā e lē ua taofia ma masalomia i le faia o le faalavelave. E lē o māua e leoleo i le taimi nei tausaga o le soifua o i la’ua ua maliliu, ae ua faailoa e le sui komesina ua iai ni faamatalaga ua taunuu atu ua faailoa ai o se  feeseesea’iga i se fanua le pogai o le tulai mai o le faalavelave.

E iai le talitonuga o leoleo o le taimi muamua lenei ua tupu ai se faalavelave matuia ma ogaoga i Savaii ua fano ai ni soifua o ni tagata se toalua. O loo taofia le faailoaina lautele o suafa o lē ua masalomia ma i laua ua maliliu se’i mae’a su’esu’ega a Malu o le Malo. 

Ua māua mai se tasi o lipoti lata mai o lenei faalavelave, o i laua ua maliliu o se tamā e 60 tausaga ma sona atalii e 18 tausaga. Faaalia mai foi se lipoti mai leoleo, o lē na faatinoa lenei faalavelave, o ia lava na aga’i i le ofisa o leoleo i Tuasivi ma faailoa i ai le faalavelave na ia faatupuina.