E toafitu sui tauva e aofia ai le toafa ai Ausetalia ma le to’atolu i Samoa ua muamua tuuina atu o latou suafa mo le fia auai i le tauvaga e saili ai se Tausala o Samoa, i le faato’a toe faia ai lea o se tauvaga i le tuanai o le lua tausaga o tolopo lea faamoemoe ona o le tapunia o tuaoi i faiga malaga masani faava o malo ona o puipuiga o atunuu mai le pipisi o le faama’i Koviti-19.
Ua faailoa mai e le ta’ita’ifono o le Manaia Event o loo tapenaina le tauvaga le susuga Leiataualesa Jerry Brunt, o le Aso Lulu na te’a nei ina ua tatala le avanoa e faaulu ai suafa o ni tamaitai mo le faamoemoe, ma molimauina ai le to’afitu ua muamua atu suafa mo le fia avea ma sui tauva.
Ua lua tausaga o tauave pea e le tausala o Samoa mai Niu Sila o Fonoifafo McFarland Seumanu le pale o le Tausala o Samoa, e mafua i le tolopo o lea tauvaga e taualuga iai polokalame o le vaiaso o le Teuila i le masina o Setema o tausaga ta’itasi. O le a faagasolo le Teuila o le tausaga nei ma le polokalame o faafiafiaga o le faamanatuina o le 60 tausaga o le tatou Malo Tuto’atasi.
