O le toafā o tagata ua maliliu i le faalavelave tau taavale na tulai mai i Bochara i Vitoria ua faailoa mai nei i lipoti a le 7News.
O Joshua Elmes e 15 tausaga, o Alicia Montebello e 31 tausaga, o Lucas Garzoli e 17 tausaga, ma Meghan Fox e na o le 14 tausaga le matua.
Fai mai faamatalaga o le toatolu o talavou ia ua maliliu ma le tamaitai e toatasi sa i totonu uma o le Toyota Corolla sa malaga atu ai ma sa feto’ai ma se laau i le itu i Sisifo o Hamilton.
Na logoina e se tagata na pasi ane i le auala lea le faalavelave i leoleo.
Fai mai sa vaaia ni ata o le tietiega a le toafā lea i luga o le social media a o lei tupu le faalavelave ma ua faailoa foi e leoleo o le saosaoa tele o le taavale le isi mafuaaga o le lavea o le taavale.
O loo faaauau pea le suesuega a leoleo i le mataupu lenei ae ua faailoa le toatele o tagata i le faaitu lea o Hamilton ua faateia i le faalavelave ma le tulaga ua tulai mai.
