E to’afā talavou, o ni fanau Maori ua faailo nei lo latou mauaina ai o ni sikolasipi e faaauau ai o latou ola a’oa’oina i Iunivesite iloga poo Ivy Leauge Universities.  

O ni moemitiga ua faataunuuina ina ua filifilia i latou nei o fanau aoga ua manumalo i le Polokalame faasikolasipi ua ta’ua Te Ara a Kupe Beaton Scholarship i lenei tausaga.  

I ripoti mai le NZ Herald o le to’afā (4) na filifilia mai ma maoa’e o latou tusi talosaga mai le 180 o fanau aoga mai le tele o Kolisi na tusi talosaga mo nei avanoa faasikolasipi.  

Ma i le faamanuiaina ai o i latou ua filifila, ua o lea ua o latou mauaina ai le ta’i $25,000 talā e fesoasoani ai i a latou tapenaga i le ulufale atu ai i Iunivesite iloga ua o latou filifili iai.  

I talaaga i le aoga e a’otauina ai fanau aoga ua faamanuiaina, o le tasi e o le alii talavou ia Luke Westrupp e aoga i le oga maualuga o le Rotorua Boys’ High School, o loo iai lona naunauta’iga e na te aveina mataupu tau i polokiki (politics) ma sootaga valelei faavaomalo, ma o loo ia mafaufauina le ave ai o ia mataupu i le Iunivesite o Yale poo le Iunivesite o Harvard.  

Faasoa lea alii talavou, “o se matati’a maualuga lea avanoa ua ia maua, ma o avanoa ua faaalia ai le telē o le agava’a o loo i tamaiti Maori”.  

  O le tamaita’i ia Erini Fruean, o le ta’ita’i tama’itai o le aoga maualuga poo le kolisi o Inglewood i Taranaki, o sē e iai ona sootaga i Samoa, Eleni poo Greece, ma o se alo e faasino i le uluai Maori na faauu mai le Iunivesite i totonu o Niu Sila, Sir Āpirana Ngata.  

I ripoti a le nusipepa a le Herald, faasoa le tamaita’i, “o loo ia tilotilo ma vaavaai i le tele o avanoa i aoga, ae o loo ia i tilotilo i se matatā e telē sona sao mo le manuia o tagatanuu Niu Sila”. 

Ta’ua foi e Erini, o loo iai lona naunauta’iga ina ia avea o ia ma faata’ita’iga i tupulaga talavou Maori ma le Pasefika e finau ia maua avanoa faapenei ina ia mafai ona faaauau le ola a’oa’oina.  

O le tasi o fanau aoga, o le alii o M’lago Morris mai Whangārei Boys’ High School, ma o loo ia mafaufau e agai i le New York University’s Tisch School of the Arts. O M’lago Morris e i le tausaga 13 ma o ia lea na manumalo i le tasi o faatasiga tele i Ueligitone, le Shakespeare Festival i lana faasoa ma faatino i ona lava taga ma gagana ma mafaufauga o se tasi o tala iloga mai le alii logologoā ia Shakespeare ua tā’ua The Taming of the Shrew.  

Faasoa M’lago i le NZ Herald, o ona moemitiga i le maua ai o lea avanoa tāua, o le avea lea o ia ma se fatonu lauiloa ma logologoā i le matātā o faatufugaga i le vaega o tala tuufaasolo faapena ata tifaga mo le maimoa o tagata (stage director).  

O lona lagona e saga faalauiloa ai lona tupuaga ma lona faasinomaga o le Maori, ae faapena ona tagatanuu ma Niu Sila. Ma e manatu lea alii o se tasi lea o auala e faasoa ma faamatalatala ai le tele o faafitauli o loo fetaia’i pea ma ona tagatanuu.  

Ao o le alii e atoa iai le to’afā o fanau aoga, o Jared Lasike mai le aoga o le Rotorua Boys’ High School, ma o lona taula’i o le avanoa e su’esu’e ai i mataupu tau faafoma’i poo le medicine. Ma o loo ia vaavaai i aoga o Harvard poo le ohns Hopkins University.  

Ta’ua e Jared le telē o le tāua ma le aogā o lona mauaina o le sikolasipi, ae i lona tilotilo, o le a mafai ona ia faaaogaina lea avanoa e toe faafoi ai i tagata lautele.  

Faamauina o nei fanau aoga ua faaaopoopo atu i le to’a tolusefulu (30) o nisi o fanau aoga sa faapena ona mua’i faamanuiaina i le Te Ara a Kupe Beaton Scholarship, e oo atu le $725,000 le aofaiga o seleni, na fesoasoani i o latou tapena mo aoaoga.  

Ta’ua i ripoti, toatele o fanau aoga sa mauaina sikolasipi i tausaga ua mavae na agai atu i le tele o Iunivesite iloga i totonu o Amerika, e pei ona faamauina ai e to’alua na agai i Harvard, le tasi i Duke University ma le tasi i Columbia, ma e 80 pasene le maualuga le tuuina atu o sikolasipi  mo Mt Holyoke student-athlete. 

I faamatalaga sa faapena ona tatala atu le avanoa mo lea polokalame faasikolasipi i le toatele o fanau aoga ofaape fanau Pasefika, ina ia fesoasoani atu i le toatele e faamautū le tele o vaega mo le ulufale atu ai i iunivesite.  

O le lona fitu ai lea ona faatino lea polokalame faasikolasipi ma na faavae mai e le Crimson Education, ma le naunauta’iga ina ia saga faamalosi’au ma fesoasoani atu i fanau Maori ia maua avanoa e ulufale atu ai i Iunivesite iloga i le lalolagi.