E to’a sefuluvalu tagata ua molia e leoleo mai osofa’iga e lima na maua ai nakoti o le ‘aisa, o laau malosi ma tupe e aofia ai ma le tagata na malaga mai Amerika Samoa, ma le tagata faigaluega o le ofisa o le fā’asu poo le quarantine.
O loo taofia le to’asefuluono o alii uma ma o loo aofia ai ma ni tagata o loo galulue o ni faia’oga, ae o tama’ita’i e to’alua o loo aofia i le sefuluvalu lea o loo tatala i tua i aiaiga masani o le saini i le ofisa o leoleo ma taofia Tusifolau.
O le vaiaso nei e tutula’i ai nisi o le to’asefuluvalu lea, ae o isi o le masina o Fepuari o le tausaga fou e faato’ā oo atu ai i luma o le Faamasinoga Maualuga e tali i o latou moliaga.
O le faaaogāina e leoleo ma le Ofisa o le Tiute o ta’ifau sosogi ma le siakiina o uta ma faamomoli i le masini fā’ata, o se tasi lea o fesoasoani ua mafai ona maua ai nakoti ua faaulufale mai i le atunuu. O le faalauiloa a le matāgaluega o leoleo i le tetee atu i le faaaogāina o pauta ma fualaau faasāina o loo faagasolo e mo le umi e 12 masina.
O Oketopa o le tausaga nei na faalauiloa ma amata ai lea taumafaiga ua autū i le fai atu leai i fualaau faasāina poo le say no to drugs.
I le Faamasinoga Maualuga e lē o ‘asa se vaiaso ma se masina ma moliaga solitulafono o le umia, faaaogā ma le faaulufale i Samoa o fualaau faasāina e tagofia ma faia iai faai’uga.
Ae i osofa’iga a leoleo e sa’ilia ai fualaau faasāina ua faailoa e le minisita o lea matāgaluega le afioga i le Palemia, ua mae’a ona ia sainia ni pepa faataga poo warrant ua avanoa ai leoleo ona tauave laau malosi i le taimi e faia ai a latou osofa’iga tau i fualaau faasāina poo drug raids.
