Ua lipotia mai e le Matagaluega o le Soifua Mālōlōina, e to’a 56 i latou ua faamaonia le pesia i le siama o le Koviti-19, e tusa ai ma faamaumauga mai i le 2:00 i le aoauli o le aso 03 Iulai i le 2:00 i le aoauli o le aso 05 Iulai 2022.
Mai lenei fuainumera, e to’a 54 i latou fou ua aafia i totonu o Samoa, ae to’alua na faimalaga mai i totonu o Samoa.
Ua oo atu ai le fainumera o le aofaiga o i latou ua aafia i le siama talu mai le 17 o Mati lea na sao ai i tua le faama’i i le 15,052. E to’alua ua faamauina o loo taofia i nofoaga faapitoa i le Maota Gasegase i Motootua.
O loo tumau pea le fautuaina e le Matagaluega o le mamalu o le atunuu ina ia aga’i i se falema’i lata ane mo le faia o tuipuipui o le Koviti-19, pe afai e lei faia pe e lei mae’a tui, auā o le puipuiga sili lea mo i tatou.
Ae lē gata i lea o le faamanatu, faamolemole ia tausisia pea fautuaga mai le Soifua Maloloina e tuuina atu pea, ina ia faaitiitia ai le soona pepesi o le siama.
