I le silia i le tolu masina talu mai Fepuari o le tausaga nei, o tolopo le valaauina o molimau o le faamasinoga o tagata e to’asefulu e aofia ai tamaitai e to’alua o loo molia i le umia o le pauta faasāina o le ‘aisa poo le methaphtamine, ua toe tolopo su’esu’ega o ia molimau i se isi taimi e toe faatulaga ai e le faamasinoga.
Na sa’i ai se finagalo o le afioga i le faamasino susuga Leiataualesa Darrel Clarke, ma fesili i le loia a leoleo i le mafuaaga o le tuai o le lipoti, ae ua silia i le 3 masina o tolopo le mataupu. Na faaalia e le loia a leoleo na faato’ā ave vaega na maua e leoleo i le ofisa o su’esu’ega faasaienisi i Nafanua i le vaiaso na te’a nei.
O le sa’i o le faamasino ona e lē gata ua toe tolo su’esu’ega o le pipi’o o leoleo i le tuai o a latou tapenaga, ae o se mafuaaga foi faapea ua toe tolopo ai se isi faamasinoga na faatulaga e su’esu’eina molimau i le vaiaso ua mavae. O le Aso Lua o le vaiaso nei na faatulaga e su’esu’e ai moliaga o le to’asefulu o tagata o loo tetee i moliaga a leoleo o le umia o ‘aisa, ma le umia o paipa e faaaogā i lea pauta faasāina.
O se osofa’iga a leoleo i Lalovaea ma Vaitele uta i le masina o Iulai o le tausaga na te’a nei, na pu’eina ma taofia ai i latou uma ua tuua’ia. I le toe tolo ai o lenei mataupu i le aso 4 o le masina fou o Iulai e toe faatulaga ai se isi aso e fofogaina ai molimau, o loo faaauau pea ona su’esu’eina molimau a leoleo i moliaga foi o le umia o le ‘aisa, o ni paipa ma laau malosi, o loo tuua’ia ai Afualo Daryl Mapu ma le tamaitai o Marie Fanueli o ni tagata sa galulue i le ofisa o le Komisi o faigapalota.
