O le masina fou o Tesema o le a lau ai se faasalaga o le tamā o Vaotuua Auleoleo Neemia, ua ioe i moliaga e lua o le fasioti tagata paivalea poo le manslaughter.
O moliaga ia ua suia iai moliaga e lua o le fasioti tagata faamoemoeina na tetee iai lē ua molia ma faatulaga ai o le tausaga fou e suesueina ai molimau a leoleo.
Peitai o le toe valaauina o le mataupu i le masina o Setema o le tausaga nei, na faaui ai i tua e loia a leoleo ia moliaga ae suia i le fasioti tagata paivalea.
O le fesiligia e le loia a lē ua molia o faamaumauga a leoleo i le solitulafono ua tuuaia ai Vaotuua, ua tolopo ai le lauina o le faaiuga i se faasalaga, ae sei tapena e le itu a leoleo ni teuteuga ia latou faamaumauga o le solitulafono mo se iloiloga a le faamasinoga.
O loo nofo taofia pea lē ua molia i le vaaiga a leoleo e faatali ai le aso 14 o le masina fou. E toalua ni tama talavou o le nuu o Afega na maliliu i le solitulafono ia Ianuari o le tausaga e 2021.
O se faalavelave na tupu ae ua faamanatu le aulia o le tausaga fou.
