Fai mai ua oo atu i le ta’i 15 afe ponesi ua ofo e nisi pisinisi mo le sailia o ni tagata faigaluega i le taimi nei i Ausetalia.
Ua lipotia e le 7News i le asō o le faaitiitia pea o le aufaigaluega i auaunaga eseese i le atunuu ua mafua ai ona faatino e nisi o le aufaipisinisi lea tulaga.
Ua faailoa i le lipoti o auaunaga e pei o galuega leipa, soifua mālōlōina ma gaosi oloa aemaise fela’uaiga o loo mātele ina mana’omia tele ai le aufaigaluega.
A o nisi pisinisi e pei ona faaalia e le Channel 7 ua oo lava i le 15 afe ponesi ua avanoa ane mo tagata faigaluega fou. O se tasi fale koleni poo le gym i Kuiniselani ua lipotia mi e 2,500 le ponesi o loo ofoina mo se personal trainer.
I le vaega o aveloli ma fela’uaiga e ta’i 2 afe ponesi ua ofoina i nisi kamupani ma le ta’i afe o loo ofo mo tagata fou e auai atu faapea foi le call centre.
O se isi fale’aiga i Melepone ua lipotia ua sauni e totogi le 10 afe mo le sailia o ni tagata faigaluega. O le taimi nei ua ave foi le faamuamua a le malo i le faagaioia o talosaga mo visa faigaluega e tusa ma le 60 afe o tagata e iai tomai faapitoa ina ia fesoasoani i le faafitauli o loo feagai nei ma le atunuu i tulaga tau galuega.
