O le sauāina o se tinā talavou i se gaioiga sa molimauina i se ata vito sa salalau i luga o fesoota’iga o le api o foliga, ma molia ai ni tama’ita’i se to’atolu ma ni alii se to’alua, o lea ua tuuina atu e le latou loia o Unasa Iuni Sapolu a latou tali tetee i moliaga uma a leoleo.
O moliaga ia e aofia ai le ave faananā o le tinā talavou na aafia o ia lea o Tito Onoafe Matagi o se tama’ita’i o le nuu o Faleasiu, o moliaga o le faaoolima, o le faia o upu taufaifai, faaoo manu’a tugā, ma moliaga o le umia o ni ‘au’upega mata’utia e pei o se seleulu, fasi u’amea, o se mae’a ma le ‘au’upega mata’utia o se laau.
O le tausaga fou lea ua tolo iai le su’esu’eina o molimau o moliaga a leoleo epei ona teena e le to’aono ua molia e aofia ai, Luulau Puao Faisauvale e 61 tausaga le matua, o Malaea Momaga Tanu o le isi ona suafa o Zhaviah Talimatasi e 29 tausaga le matua, o Pau Kaio e 26 tausaga le matua, o Talimalama Taualai e 31 tausaga le matua, o Kaio Kaio e 32 tausaga le matua, ma Luulau Lealofi Palau Faisauvale ua 39 tausaga le matua.
O loo faaauau tuutuuga o loo tatala uma ai i latou i tua e faatali le aso o lo latou faamasinoga.
