Ua faamauina nei e le Faamasinoga Maualuga le tali tetee a le tamaitai o Papalii Sia Figiel e ala atu i lana loia o Unasa Iuni Sapolu, ma ua faatulaga ai le masina o Mati o le tausaga fou 2025 e suesue ai molimau a leoleo ma mau a lē o loo molia e lagolago ai lana tetee.

O le taunuuga lea o le toe valaauina o moliaga autu a leoleo e pei o le fasioti tagata faamoemoeina, ma le umia o se aupega matautia o loo tuua’ia ai Papalii Sia Figiel 57 tausaga o le soifua, o se tusi solo ma tala fatu.

O loo nofo taofia pea i le vaaiga a leoleo talu mai le masina o Me na tulai mai ai le solitulafono o loo molia ai, e pei ona maliu ai se tina 78 tausaga o le soifua, o se Polofesa ae o se tagatanuu o Amerika Samoa.

O le Aso Gafua a sau e toe valaau ai le mataupu tau faamasinoga lenei, mo le tuuina atu o le talosaga a lē o loo molia e ala i lana loia ina ia tatala i tua i ni aiaiga.

O suesuega faafomai i le tulaga i se gasegase o le mafaufau o aafia ai lē o loo molia, o loo faaauau pea, ae pau le tulaga mautinoa o lea ua mafai ona faia lana tali tetee i moliaga auā tasi lea o mafuaaga na tuai ai ona tuuina atu sana tali, ona sa tālia muamua suesuega faafomai pe agavaa ai ona tuuina atu sana tali i moliaga o loo tuua’ia ai.

Ua mae’a suesuega faafomai i le tino maliu o le tina 78 tausaga na maliu i le gaioiga solitulafono, ina ua uma ona faatino le taotoga faapitoa e pei ona sa faatonuina e le pule o maliu le coroner.

Ua mae’a foi ona tuuina atu le tino maliu o le tina i lona aiga mo sauniga mulimuli.