O le folafola mai o le faia o se aso malolo faapitoa mo le faamanatu ai o le tuumalo o le Tupu Tamaitai o Peretania ua talia lelei e nisi ae o loo gugulu ai le aufaipisinisi ma isi ona fai mai a latou ua faafuaseia mai lenei faasalalauga ma lenei faaiuga ae le o sauni iai i latou.
O le Australia Retailers Association poo le asosi o le aufaipisinisi laiti ua o latou unaia Setete ma teritori ina ia faamautinoa ane tulaga o fefaatauaiga i le aso lea ua atofa e avea ma aso malolo o le atunuu, le aso 22 o Setema.
Fai mai a latou o le a tele ni fetuuunaiga e faia i le aufaigaluega ma tagata avanoa ane i lea aso aemaise e ao ona faatulaga tulaga uma tau totogi ma tulaga masani o galuega i aso faapea.
Fai mai a latou e mananao foi latou e faailoa lo latou faaaloalo i le Tupu Tamaitai ae ao ona manino tulaga ia ona e toatele foi tagata e aafia ai.
