E lima moliaga a leoleo e mafua mai i se faasalalauga i luga o fesootaiga televavave faaonapo nei, ua teena e sui faasalalau e toalua o le polokalame o le maota o viiga mai Sini Ausetalia, lea sa tutulai i le aoauli o le Aso Lua o le vaiaso nei i le faamasinoga faaitumalo mo le toe fofogaina o o la moliaga.
O le la teena o moliaga a leoleo e fesootai ini faasalalauga tau faaleaga i le la polokalame ua tolopo atu ai i le aso 28 o le masina le suesueina o le la talosaga ua faaulu e le la loia mo se avanoa e tuua ai le faamasinoga a Samoa ae foi atu i Ausetalia, ma le fuafuaga e toe foi mai e auai i lo la faamasinoga.
O loo tetee malosi le itu a leoleo i lea talosaga ae o le a folasia i suesuega a le faamasinoga i le vaiaso asau mafuaaga o le talosaga faapea mafuaaga o le tetee a leoleo.
O loo iai se talosaga a leoleo e toe faia se fetuunaiga i aiaiga o loo tatala ai tua i laua ua molia o le tina o Ainuu Iliganoa Savainaea ma lona toalua le afioga Tolafoa Saia Tolefoa.
O loo manao leoleo e taofia le polokalame sei maea suesuega a le faamasinoga, ma o le aso 28 foi e suesue ai ma lea talosaga mai le itu a leoleo.
Ae o tualumaga i le Aso Lua o le vaiaso nei sa faailoa e le loia o loo tulai mo i laua ua molia le iai on se tapenaga faaletulafono o le a folasia i le faamasinoga i se taimi e finauina ai le taofia o le suesueina o moliaga, ona o lē o loo tagi e le o faamautū i Samoa.
