O loo valaau nei nisi o kulupu i le Pasefika ia Iapani ina ia faamuta loa ana fuafuaga mo le lafoai o otaota tau niukilia i le vasa Pasefika. 

Ua ta’ua i le RNZ Pacific o le amataga o le masina na tea nei na amata fausia ai e le malo o Iapani ni nofoaga mo le lafoai ai o ia otaota mai le Fukushima nuclear power plant.

I se taumafaiga la tuufaatasi ua tuuina atu ai se pepa o faamatalaga mai kulupu nei o le Pasefika ia Iapani, o le gaioiga o loo latou faatino ua solia ai le aiātatau a tagata Pasefika e faamama ai o latou siosiomaga.

Fai mai a latou o le taimi nei o loo lamatia le vasa Pasefika ma ona siomaga ma a toe faaopopo atu foi iai ma faiga ia a Iapani o lona uiga o le a matuai tele se aafiaga. O le isi itu taua ona e aafia ai foi ma le soifua o tagata.

E lei tali mai Iapani i lenei finauga ae o i latou o loo aofia i lenei soofaatasi e aofia ai faalapotopotoga tumaoti ma i latou e finauina le saogalemu o le siosiomaga.

I le amataga mai foi o le tausaga sa iai foi ni lipoti na taua ai le fautuaina e le Pacific Island Forum o Iapani ina ia toe mafaufau i ana fuafuaga e lafoai otaota faapea i le vasa Pasefika.