Ua faamautū mai e le afioga i le Palemia i se feiloaiga i le Aso Lua o le a toe asia e le Palemene le aiaiga o le faavae e faasino i le nofoa faaopoopo o tamaitai i le 10 pasene.

O le faato’ā tāpā lea o se finagalo o le taitai o le Malo le Afioga Fiame Naomi Mataafa, i le tuanai ai o le faaiuga a le faamasinoga i le mataupu lenei e pei ona ua faamautū ai ua lē 2 nofoa faaopoopo e atoa ai le ono o sui faipule tamaitai i le paea’iga lona 17 a le Palemene, ae ua fitu. O le paea’iga lona lua lenei ua faaaogā ai le vaega 44 (1a) o le tulafono mo le faaatoaina o nofoa o tamaitai peitai ua manino i le faauigaina ma le faamatalaina e le faamasinoga o lea vaega ma ona aiaiga e le gata o le 10 pasene ia faamalieina ae o se tamaitai e filifilia mai se faigapalota mo nofoa e 51 o itumalo faapalota e tatau ona toe saili se isi tamaitai mo lea nofoa pe afai e alualu faamavae pe soloia le nofoa pe o nisi mafuaaga.

E avanoa foi i lea tulaga le sailia pea o se tamaitai e tauaveina le nofoa ua avanoa pe afai e faia se palota laititi ae manumalo mai se sui tauva tama tane. O se lipoti o le a tauaaoina e le Komisi su’esu’e o faigapalota e pei ona mae’a filifilia ona sui, o le a talia ai se fautuaga i le Palemene e faatatau i le aiaiga o le 10 pasene mo nofoa faaopoopo o tamaitai i le Palemene o Samoa.

O le Aso Lua na faatauto ai sui faaopoopo e to’atolu o nofoa o tamaitai i le saofaiga o upufai o le Malo, lea ua tulai mai ai le afioga Toomata Norah Leota mai le itumalo faapalota o Anoamaa Numera 2, Faagasealii Sapoa Feagia’i mai le itumalo faapalota o Aleipata Itupa i Lalo, ma le afioga Aliimalemanu Alofa Tuua’u mai le Itumalo o Alataua i Sisifo. Ua ta’i lua ai nei sui usufono o ia itumalo i le paea’iga lona 17 a le Palemene.