Ua tele fuafuaga sa faamoemoe e faatino i le vaiaso lenei ua toe tolopo uma i tua sei mautu se finagalo o le Mālō i se aso e toe tatala ai galuega ma aoga faapea isi auaunaga o loo manaomia e le atunuu. 

O le kolisi faafaifeau o le Ekalesia Metotisi i Piula sa faamoemoe e a’e i le vaiaso nei peitai ua toe tolo atu i le Aso Faraile e fua i le maea poo le faaauau pea o le tapunia o le atunuu atoa. 

O fonotaga ma aoaoga faalegaluega a nisi o Matagaluega ma Faalapotopotoga a le Mālō ua toe taatia mo se isi aso e faapena foi i nisi o maliu ma faaipoipoga. O le tasi o vaega taua o le resitalaina lea o fanau ua talia mo le tausaga amata o aoaoga faaiunivesitē i totonu o le Iunivesite Aoao o le atunuu ua lē faataunuuina foi. 

O le malaga taamilo i Savaii mo nisi o alii ma tamaitai tusitala mo le tuliloaina o atinae tau tafafao i pisinisi faletalimalo faapea falenofo tu matāfaga ua faapena foi ona tolopo ma e lei iloa seisi taimi e faataunuu ai.

O le itu taua sa fia tuliloa i lea malaga na tapena e le Pulega o tagata tafafao mai fafo o le fesoasoani e $5 miliona tala mai le Mālō ua maea faasafua atu e fesoasoagi ai i pisinisi tau tagata tafafao mai fafo o i latou ua sili ona pagātia ona o aafiaga mai le faama’i Koviti19.