E tele lu’itau o le a feagai ma le afioga i le sui Peresetene filifilia o Faamasinoga o Fanua ma Suafa le afioga Afamasaga Michael Soonalole, ua amata aloaia nei ona tiute ina ua mae’a ona faatauto i luma o le afioga i le Peresetene o lea faamasinoga le afioga Lesatele Rapi Vaai, ma le mamalu o lea faamasinoga tāua a Samoa.
O lu’itau tetele o le galuega na faailoa e le Peresetene o le sosaiete a loia i Samoa le susuga Alex Su’a o se tasi o loia sinia sa aoaoina faatasi ma le Sui Peresetene i le Iunivesite a le Pasefika i Vanuatu o loo aoaoina ai alii ma tamaitai e fia avea ma loia.
O se tasi o lu’itau na faailoa e le Peresetene a le sosaiete a loia, o faitioga o le a feagai ma le Sui Peresetene i ni faaiuga o le a lē talia e nisi o le atunuu o le a sulufai atu mo se fofo o ni mataupu tau i fanua faaleaganuu ma suafa matai.
Peitai o le fautuaga a le peresetene o le sosaiete a loia, ia aua nei avea ia faitioga ma faavaatu’ia i le faatinoga o tiute fai mo le Sui Peresetene.
Na saunoa foi le tamaitai Loia Sili a le Malo le susuga ia Su’a Hellene Wallwork-Lamb ma ave lana faamalosi’au i le Sui Peresetene, ina ia sagai ane ‘ai o le tai ina ia folau ma le faatuatua i le Atua le faatinoina o galuega a le Sui Peresetene.
O se taimi muamua lenei ua filifilia ai se tamalii e iai ni ona tomai faaloia, e seei i le tofiga Sui Peresetene i aiaiga o le Tulafono fou o Faamasinoga o Fanua ma Suafa.
Na momoli le faafetai a le afioga Afamasaga Michael Soonalole ia i latou sa tuuina atu le lagolago o fautuaga ma timaiga, a o amata mai lona taumafai i le fia ausia o faailoga e avea ai ma loia, a o galue i le matagaluega o leoleo, falepuipui ma le ola toe fuataina.
O le saunoaga a le afioga i le Peresetene o lea faamasinoga na taualuga iai le sauniga o le faatautoga ma momoli ai ana faamanuiaga i le tulai mai o lea tamalii na te tauave lea tofiga tāua i le tautuaina o le atunuu i le Faamasinoga o Fanua ma Suafa.
Ua 18 tausaga o avea Afamasaga ma loia i lo tatou atunuu.
