Ua faalauiloa mai nei le telē o faamoemoega a le ‘ausiisii a Niu Sila, o le tausaga fou 2026 o le a maua ai se ulua’i pine auro mai le itupā o tama’ita’i i taaloga o Malo o le Taupulega poo le Commonwealth Games.
O lagona ma manatu ua faaalia, i le to’atele o tama’ita’i fai mai o lenei taaloga ua molimauina le mata’ina o a latou taumafaiga.
I taaloga a le atunuu i su’egā siamupini na māua ai, e silia ma le to’aselau ‘autaaalo na tausiniō o le 2/3 o i latou nei o tama’ita’i.
Faamauina e to’alua ni alo tama’ita’i talavou, o le tasi e suafa ia Olivia Selemaia, e 19 ma le isi o Litia Nacagilevu 18 tausaga, na molimauina le matagofie o a la taumafaiga, ma na māua lo la manumālō ai i vaega o loo taaalo ai.
Faamauina foi lo la faatū ai o ni matāti’a o lenei Itulagi (Oceania) o matāti’a o le atunuu (national records) a o tumafaiga malosi a i la’ua nei i taumafaiga i le su’egā siamupini i le lalolagi – World Championships.
Faaalia e le peresitene a le ‘ausiisii a le atunuu, Simon Kent, le vaaia le alualu i luma o le atia’e o le taaloga i itupā o tama’ita’i pea tilotilo atu i le galuega faatino nei i a’oga ma le polokalame o le Lift for Gold programme.
E telē faamoemoega o le alii peresitene, o lona iloa pe ā ma le to’asefulu ma le lua ‘ausiisii o le a saofagā atu mo taaloga o malo o taupulega i le tausaga fou 2026 i Glasgow.
I faamaumauga o le tama’ita’i o Selemaia, Nacagilevu faatasi ai ma le alii o David Liti o loo lona tolu nei i faatulagaga o tulaga i malo o taupulega ma o loo iai le faamoemoe e tauva i taaloga o lenei Itulagi – Oceania Championship e faatautaia i Samoa i le masina o Aperila.
Puna o Faamatalaga: https://www.rnz.co.nz/news/sport/580862/weightlifting-women-gun-for-first-commonwealth-gold
