O loo teena e se tamā ona moliaga o le ulufale faamalosi atoa ai ma le toesea o meatotino mai le aoga a Le Amosa o Savavau i le aso 5 o Aokuso, 2023.
O Molesi Maiava 45 tausaga le matua o le tamā atoa ai ma le atalii o lona uso e igoa ia Lene Maiava 25 tausaga, na la ulufale faamalosi i le aoga ua ta’ua i luga, ma toesea mai ai le moavao e tusa lona tau ma le $1,199, o le Kitara e tusa le tau ma le $600 NZD tusa lea ma le WT$991, o le speaker e tusa le tau ma le $2,000, ma le uaea mōli umi e tusa ma le $100 lona tau.
O le aofaiga o le tau o meatotino ua toesea e tusa lea ma le $4,290.
I tolaulauga a le Faamasinoga sa teena ai e Molesi ona moliaga, o lana tala i le Faamasinoga o ia e lē iloa se mea na alu atu la fetaiai ma le atalii lea o lona uso o sau mai fafo ma le lotoā o le aoga, peitai ua ioe Lene i ona moliaga uma.
O le alii o Lene e iai ana soligatulafono muamua o loo maua i faamaumauga a le Faamasinoga, o loo iai foi ma le tusi saisai o le lē tulai i le faamasinoga i isi o ona moliaga muamua.
Ua tuuina atu la iai e le Faamasinoga le aso 19 o le masina nei e tatau ona tulai ai e tali muamua i le tusi saisai a o lei tulai ai i le aso 13 o Oketopa mo se faaiuga a le Faamasinoga ia te ia.
O le tamā o Molesi lea o loo tetee ua tuuina atu le suesueina o ona moliaga i le faamasinoga i le aso 4 o Tesema o le tausaga nei i le itula e 10 i le taeao.
E lē o teena e le itu a leoleo le tatala ai i tua o lea tamā.
