Ua teena e le ofisa o le Faamasinoga o Fanua ma Suafa a Samoa le talosaga sa faauluina e nisi o suli o le suafa Tuisinavemaulumotootua lea na faaee atu o se faaaloalo i le afioga i le Palemia o le malo o Niu Sila i le Aso Gafua ua mavae.
Ua faailoa lea faai’uga i le tusi mai le lesitala o lea faamasinoga na tuuina atu i le Aso Faraile na te’a nei i suli sa faauluina le talosaga tetee.
O loo faailoa ai i le tusi e le agavaa ni itu talosaga e faauluina i le faamasinoga ona o le suafa na faaee i le Palemia o Christopher Luxon sa faatinoina i tulaga mamalu taualoa ma aloaia a Samoa, ma sa ofoina atu e amana’ia ai tagatānuu mai fafo (honorary basis).
O le suafa foi sa faaee atu i le Palemia o Niu Sila e lē lesitalaina i le api resitala o matai Samoa ma e lē faasalalauina foi i le Savali le nusipepa a le malo.
Ua na ona tuuina atu o le tusipasi taualoa o suafa matai poo le honorary matai title certificate e aloa’ia ma amana’ia ai le faaeeina o le suafa matai.
“Ona o māfua’aga ua tuuina atu i luga, e failoa atu ai ma le faaaloalo tele, e teena le faauluina o le talosaga e pei ona taulimaina e le tatou ofisa”…o le faai’uga lea o le tusi mai le lesitala o Faamasinoga o Fanua ma Suafa a Samoa.
E pei ona silafia ua to’aono i le Palemia o loo iai nei o Niu Sila, sui faipule o le Palemene o Niu Sila ua faaee iai suafa matai o Samoa:
- Leasapai Robert Muldoon – 1981
- Tagaloa David Lange – 1982
- Nanai Jim Bolger – 1997
- Toosavili John Key – 2009
- Leulua’ialiiotumua Bill English – 2017
- Tuisinavemaulumotootua Christopher Luxon – 2026
Faapea le ta’ita’i o le vaega faaupufai a le New Zealand First:
- Vaovasamanaia Winston Peters.
O le fono a Malo o le Taupulega sa talimalo ai Samoa i le tausaga e 2024 e lua suafa matai na faaee i le Tupu o Peletania o le suafa Tuitaumeasina o le faaaloalo maualuga a le afio’aga o Moataa, ma le suafa To’aigaotumua o le faaaloalo maualuga a le afio’aga o Siumu.
