Ua lē faamalieina le Faamasinoga Maualuga i le aotelega o mau sa tuuina atu e le vaega faaupufai e puipuia aiā tatau a tagata, e lagolago ai lana talosaga mo se poloa’iga a le faamasinoga e taofia lē tumau ai suiga ua faia i tofiga o ta’ita’ifono ma sui o komiti o Fono Faavae o le poloketi o le atina’e o itumalo poo le poloketi miliona, se’i mae’a ona su’esu’eina lana lu’i faaletulafono ua faaulu, ua finauina ai le tulaga faaitu’au ma le faapito o ia suiga e pei o le tofiaina o ta’ita’ifono o komiti o Fono Faavae lea e lē o filifilia iai faipule o lea patī faaupufai.
O le teena ai o lea talosaga mo se poloa’iga lē tumau sa faailoa i se faai’uga a le Faamasino Sili na fofogaina i le Aso Gafua o lenei vaiaso.
Ua finagalo le faamasinoga e lē mafai ona ia aiāina faiga faavae a le malo i le faia o ni suiga i le ta’iala ua faata’oto e le malo lea na amata faatino ia Ianuari o le tausaga nei, ae o le a laolao i se finauga e faia ai molimau ma ni folasaga faaletulafono a loia, e ala lea i ni mau e tuuina atu i su’esu’ega masani a le faamasinoga poo se substantial hearing.
O se poloa’iga e tuuina mai e taofia ai le faagasologa o galuega o le atina’e o itumalo ae faatali se’i mae’a su’esu’ega o le tagi autū a le itu talosaga e manatu le faamasinoga o le a oia ai le sologa lelei o le atina’e aemaise i fuafuaga o le tufaina o le fesoasoani tupe mo le toe a’e o a’oga lea o loo faagasolo.
O le isi itu na pasia talu ai nei le tulafono e faatūina ai le pulega fou e vaaia lea polokalame o le atina’e o itumalo lea e faato’ā amata faamamalu i le masina o Iulai o le tausaga nei, ma e tāua i le faamasinoga le tuuina atu ai o ni finauga a loia mo itu auai o le matāupu, pe a oo ina amata faamamalu lea tulafono ua pasia e le Palemene.
O le aso 9 o le masina fou o Aperila e valaau ai le tagi a le vaega e puipuia aiā tatau a tagata mo tapenaga a loia, a o le’i su’esu’eina mau o lea finauga i le masina o Iulai o le tausaga nei.
