Ua faaauau pea ona tauave e le afioga i le Faamasino Sili le suesueina o talosaga o loo taoto nei i le faamasinoga a le afioaga o Leauvaa, ina ua teena le talosaga a le nuu o Afega sa finau ai le latou loia, ina ia faasee tuagalu le Faamasino Sili le afioga Satiu Simativa Perese.
O lea talosaga a Afega sa mafua ona o mau sa tuuina atu e le latou loia na ta’ua ai e fesiligia le tutoatasi o se faaiuga a le Faamasino Sili ona o ia o se tagata lotu Katoliko, ae o le nuu o Leauvaa e fulisia i tagata o lea tapuaiga Kerisiano.
Sa latou avatu foi se tasi o mau e faapea o ni saunoaga a le Faamasino Sili ina ua amata fofogaina le talosaga a Leauvaa mo le faia o se poloaiga, ae ta’ua ai e le Faamasino Sili lona faia o se poloaiga a o lei suesueina auiliili le talosaga o se ata manino lea o le mamafa o lana silasila i le nuu o Leauvaa.
O se isi o mau na tuuina atu e le loia a Afega e lagolago ai le talosaga o se saunoaga a le Faamasino Sili a o faagasolo taualumaga o le tagofia le talosaga mo se poloaiga, na ia faaalia ai e pule leoleo poo le poloaiga a le Faamasinoga o Fanua ma Suafa poo le poloaiga a le Faamasinoga Maualuga latou te faamalosia.
O mau na tuuina atu e lagolago ai lea finauga ua lē faamalieina ai le faamasinoga i se faaiuga e talia ai le talosaga a Afega e faasee tuagalu le Faamasino Sili.
O le afioga i le tamaitai faamasino o le Faamasinoga Maualuga le afioga Niavā Mata Tuatagaloa ma se faamasino i Niu Sila o loo seei i le Faamasinoga o Talosaga Toe Iloilo a le Faamasinoga Maualuga a le atunuu o Justice Young sa suesueina le talosaga i le faasee ese o le Faamasino Sili.
O le teena ma le faalēaogāina o lea talosaga ua toe faaauau ai ona tauave e le Faamasino Sili le tagofia o le moliaga o le lē usitai i le poloaiga a le faamasinoga le contempt of court lea ua molia ai le nuu o Afega.
O le Aso Faraile lenei o le a valaau ai lea mataupu mo le valaauga muamua poo le mention, ma o le a faatulaga ai foi ma se aso e suesue ai.
I le talosaga a Leauvaa mo se iloiloga faaletulafono le judicial review lea o le a seei ai ni faamasino e toatolu e aofia ai le Faamasino Sili, ua faatulaga mai o le aso 15 o le masina nei o Me e tauaofia ai.
